Сэтинньи 2 күнүгэр Норуоттар сомоҕолоһууларыгар анаммыт Дьокуускай куорат чемпионата буолан ааста. Күрэххэ элбэх муҥутуур ситиһиилэр буоллулар, ол курдук Уолан Оконешников умсаах көрүҥҥэ 2570 очкону ылла. Олег Андреев 55/4 биэстээх хаамыскаҕа оҥордо.

Бу күрэххэ Дьокуускайга пропискалаах дьон уонна күнүскү кэмҥэ үөрэнэ сылдьар студент оҕолор кытыннылар. Барыта 65 киһи кыттыыны ылла.

Кыйыылаахтар куорат чемпионатыгар анаан оҥоһуллубут кыраһыабай мэтээлинэн, грамотанан, сыаналаах сертификатынан наҕараадаланнылар. Муҥутуур кыайыылаахтар, буоларын курдук, кубоктарынан уонна анал сыаналаах бириистэри туттулар.

Михаил Петров үбүлүөйүнэй төрөөбүт күнүнэн Дьокуускай куорат Думатын бастакы солбуйааччытыттан Евдокия Ивановна Евсиковаттан бочуотунай грамота уонна түөскэ иилиллэр анал знагынан бэлиэтэннэ.

Доруобуйаларыгар хааччахтаах дьоммут Дьокуускай куорат инвалидтарын обществотын председателя Александра Максимовна Николаеваттан эмиэ анал бириистэри туттулар.

Бриллиантовай циркабыт артыыһа Роман Романов олус чаҕылхай, ураты нүөмэринэн эҕэрдэлээбитэ биир эмиэ чаҕылхай өйдөбүл буолла.

Бүгүҥҥү күрэхпитигэр элбэх саҥа дьон кытынна, саҥа ааттар таҕыстылар. Олус кыраһыабай, чаҕылхай оонньуулары көрдүбүт, дьоммут бары астынан, үөрэн көтөн тарҕастылар.

Бу күрэх үрдүк таһымҥа ааспытынан Дьокуускай куорат спорка управлениетын начальнигар Эдуард Васильевич Ефимовка, үлэлэспит судьяларбар, күрэххэ кэлэн кыттыбыт дьоммор махталбын тириэрдэбит.

Мария Иванова, күрэх сүрүн судьуйата, сахалыы остуол оонньуутугар спорт маастара